Skuadra e Elbasanit ka hedhur pas krahëve ndeshjen e ditës së shtunë në kampionat kundër Besës dhe tashmë po përgatitet të kalojë me sukses të plotë takimin e radhës, që do të luhet në "Ruzhdi Bizhuta". Bëhet fjalë për takimin e kupës, ku Elbasani, në gjysmëfinalen e parë, do të gjejë rivalen Tirana, në një takim i cili në fakt po pritet me shumë interes në kampin verdheblu. Fakti që në vitet e fundit verdheblutë kanë pasur një rivalitet të fortë me bardheblutë dhe për më tepër rëndësia që kupa ka për të dyja skuadrat, e ka bërë shumë më të rëndësishme këtë ndeshje. Nga ana tjetër, ndeshja paraqet një interes të veçantë edhe në radhët e të dy tifozërive, teksa sportdashësit elbasanas në të gjitha në takimet kundër Tiranës kanë qenë të shumtë në numër. Por tashmë që takimi është më i rëndësishëm se kurrë, drejtuesit e Elbasanit kërkojnë një sakrificë më shumë nga ana e sportdashësve verdheblu. Një thirrje të tillë në fakt e ka bërë vetë presidenti Arben Laze, i cili në linjë telefonike nga Maqedonia, ka deklaruar: "Dua t'u bëj thirrje të gjithë tifozëve elbasanas që të jenë të pranishëm të mërkurën në stadiumn për këtë ndeshje. Ne do të bëjmë një organizim model në të gjitha drejtimet, për të treguar se edhe në këtë aspekt jemi një klub shembullor. Tirana do të pritet në mënyrën më të mirë nga ana jonë, për të larguar çfarëdo lloj dyshimi nga ana e tiofozëve të Tiranës në lidhje me mikpritjen tonë. Po kështu, mendojmë të organizojmë edhe tifozërinë tonë të zjarrtë, e cila për ne është një impuls shumë i rëndësishëm. U kemi shumë borxhe tifozëve tanë dhe duhet t'ua shlyejmë ditën e mërkurë. Megjithatë, për të arritur deri këtu, nevojitet një mbështetje e madhe nga ana e sportdashësve tanë. Të mërkurën kam shumë dëshirë të shoh një stadium të elektrizuar dhe kam bindjen se kështu do të ndodhë. Në një rast të tillë do ta kemi shumë më të lehtë fitoren, duke e siguruar kualifikimin që në Elbasan. Nga ana tjetër, dua të theksoj se hyrja për femrat kësaj radhe do të jetë falas," - ka shpjeguar presidenti Arben Laze, i cili këmbëngul se, në rast se gjithçka do të luhet në mënyrën më të pastër, Elbasani do të jetë fitues i kupës. "Kanë filluar të bëhen shumë kalkulime në dëmimin tonë dhe trukimet e ndeshjeve janë gjëja e vetme së cilës i trembem. Megjithatë, nëse gjithçka luhet pastër, kam shumë besim se do të jemi fitues të Kupës së Shqipërisë," - shton Laze, i cili në momentin që ka folur, ka qenë në Maqedoni, duke ndjekur një ndeshje të kampionatit maqedonas mes Vardarit dhe Certanias. "E kemi ndjekur këtë takim për shkak se jemi duke vëzhguar dy lojtarë maqedonas që luajnë te Vardari. Kemi plane afatgjata dhe për të ardhmen do të këmbëngulim të ndërtojmë një ekip kompetitiv," - përfundon numri një i Elbasanit, Arben Laze.

Ervin SINA

www.sportishqiptar.com.al 

  Pas javës që u mbyll në kampionatin shqiptar skuadra e Elbasanit ka bërë një zbritje drastike në renditje, nga vendi i tretë, në vendin e gjashtë. Një situatë e tillë, veç zhgënjimit të thellë, ka sjellë edhe një heshtje totale në kampin verdheblu, ku asnjëri nuk ka dashur të prononcohet në media në lidhje me këtë humbje, e cila në rrethe të ndryshme sportive në Elbasan është quajtur e turpshme. Për këtë arsye, më së shumti janë akuzuar futbollistët me eksperiencë në skuadrën elbasanase, pa harruar që pika e parë e kritikave pas ndeshjes ishin edhe lojtarët e rinj. Gjithsesi, autokritika e Elbasanit nuk mund të bëhet në këtë mënyrë, me akuza kafenesh, por me një analizë të detajuar dhe të hollësishme, e cila duhet të nxjerrë në pah në fakt shkaqet reale që çuan në krijimin e kësaj humbjeje, e cila në fakt duket se e ka nxjerrë Elbasanin jashtë luftës për objektivat e kërkuar në kampionat. Një dështim që ende nuk është zyrtar, pasi ka ende shumë javë për të luajtur, por e keqja është te dera dhe elbasanasit duket se e paskan shumë të vështirë ta largojnë mallkimin nga porta e vet. Vendi i tretë gjithsesi është ende një llogari e hapur, por nëse Elbasani ka si objektiv kryesor Kupën Intertoto, atëherë duhet të fillojmë të bëjmë mirë llogaritë edhe me milionat e shumtë të harxhuar në këtë sezon vetëm për një pjesëmarrje në një kupë, si ajo Intertoto, e cila nuk të çon asgjëkund dhe nga e cila nuk ke asnjë përfitim. Për këtë arsye, kampionati i Elbasanit që tani mund të quhet një dështim më vete. Tani Elbasani shikon vetëm nga Kupa e Shqipërisë dhe kjo është dukshëm e kuptueshme, duke marrë në konsideratë edhe deklaratat jashtë diktofonit të drejtuesve të Elbasanit, të cilët në njëfare mënyre kanë kërkuar të mos e dramatizojnë situatën, vetëm për shkak se në horizont është gjysmëfinalja e parë e kupës më datë 9 prill dhe një humor i keq në prag të një ndeshje të tillë mund t'i prishë shumë punë trajnerit Alimehmeti. Madje është kjo një nga arsye përse mund të mos ketë gjoba dhe paralajmërime lojtarësh në kampin verdheblu. Sot do të ketë vetëm tone të ashpra në analizë dhe ndoshta asnjë gjobë. Të hënën gjithashtu Elbasani do të fillojë përgatitjet për ndeshjen e radhës në kampionat kundër Besës, por mendja e verdhebluve është në datën 9 prill, në takimin e kupës, gjë të cilën në fakt e pohon edhe Tetova, i cili nuk arrin të shpjegojë dot humbjen kundër Tiranës. "Eshtë shumë e vështirë për të shpjeguar atë që ndodhi. Duhej ta administronim atë gol të shënuar në pjesën e parë, por krejt papritur u gjendëm në disavantazh. Një humbje e cila djeg shumë, duke menduar edhe rezultatet e kundërshtarëve. Fajtorë jemi vetëm ne futbollistët, të cilët duhet të fitojmë besimin te drejtuesit e skuadrës dhe te sportdashësit tanë, të cilët më të drejtë janë shumë të mërzitur. Tani gjithsesi nuk ka më kohë, pasi në prag është ndeshja me Besën në kampionat, e cila duhet fituar dhe mbi të gjitha duhet të përgatitemi maksimalisht për ndeshjen e parë të kupës, kushdo qoftë kundërshtari. Kupa tani është shpëtimi i vetëm për ne," - ka përfunduar Tetova.

 

www.sportishqiptare.com.al